Piratepartei Lëtzebuerg

Reboot Luxembourg!

Zum Europäeschen Dateschutzdag – Privatsphär ass e Mënscherecht!

Zum Europäeschen Dateschutzdag den 28. Januar widderhëlt d’Piratepartei, datt de Schutz vun der Privatsphär en essentiellt Mënscherecht ass. Den Dateschutz an de Respekt vum Privaten dierf net deenen zum Affer falen, déi am blannen Aktionismus elo no méi Iwwerwaachung jäizen. D’Pirate fuerderen weider de Stopp vun der Vorratsdatespäicherung, keng weider PNR-Ofkommes, eng komplett an ëffentlech Oplëschtung vun alle staatlechen Datebanken an eng Informatiounscampagne déi d’Bierger driwwer informéiert, wéi eng Donneeën vun ons all gespäichert a verwäert ginn. Säit 2005 gëllt zu ... Zum Europäeschen Dateschutzdag – Privatsphär ass e Mënscherecht! weiderliesen

Neijoosch-Pressekonferenz vun der Piratepartei

D’Piratepartei huet um Méindeg, den 19. Januar, op hir Neijoosch-Pressekonferenz invitéiert, an där se e klenge Réckbléck op elo 400 Deeg Regierungszäit vu Blo-Roud-Gréng gemaach huet an och hir Projete fir d’Joer 2015 virgestallt huet.

Ugefaange beim “Renouveau démocratique”, deen, laut dem LSAP-Fraktiounschef Alex Bodry, de gréissten Debat bedeite géif, dee Lëtzebuerg jee gesinn hätt: no 400 Deeg Regierungszäit vun enger méi progressiver Koalitioun hätt ee sech scho vill kënnen erwaarden. Feststelle muss een allerdéngs, datt ausser Kommunikatiounsdebakel, Projeten aus den Tiräng vun der Virgängerregierung an e puer eegene Projeten, déi stéckweis ëmmer méi verwässert ginn, net méi vill iwwreg bleift. De Sven Clement, President vun der Piratepartei heizou: “Dës Regierung hält et esou mam demokrateschen Debat ewéi d’Regierung virdrun: Et gëtt eppes beschloss, an de Raum gestallt a gewaart, op d’Bierger eppes soen. An elo kënnt den Twist: gëtt sech driwwer opgereegt, dann heescht et ganz einfach: mir goufe falsch verstanen! Eng modern Kommunikatioun gesäit aneschters aus!”

An der Pressekonferenz goung et awer och ëm de Referendum, deen de 7. Juni ofgehale soll ginn. D’Piratepartei begréisst et prinzipiell, datt d’Vollek ëm seng Meenung gefrot gëtt. Dozou den Andy Maar, Generalsekretär vun der Piratepartei: “Mir ginn d’Gefill einfach net lass, datt d’Froe bewosst aus engem parteipolitesche Kalkül gewielt goufen. Et si Froen, bei deenen ënnert de Majoritéitsparteie schonn e Konsens besteet, aner, ganz pertinent Froen, ewéi d’Ämterkumül, d’Fusioun zu engem eenzege Walbezierk fir Lëtzebuerg oder d’Fro iwwert d’Monarchie ginn net gestallt. Des weideren ass dat Hin- an hir, ewéi elo ganz Rezent bei der Trennung tëscht der Kierch an dem Staat, ganz einfach fir de Bierger irreführend. Mir hätten hei ganz gär, datt elo endlech déi konkret Froestellung bekannt muss ginn.”

Doriwwer, datt parallel zu de Virbereedunge vum Referendum mat der Kierch iwwert eng Kompromëssléisung diskutéiert gouf, kann ee streiden. Mir kritiséieren awer ganz entschidden déi ontransparent Virgoensweis. Bis elo sinn nach keng Detailer iwwert den Accord bekannt, deen haut ënnerschriwwe soll ginn. Et gouf net am Virfeld mat de Bierger doriwwer diskutéiert, wéi den zukënftege Lien mat de Cultë soll ausgesinn. Dat mannst wier gewiescht, fir an der Chamber mat den anere gewielte Vertrieder doriwwer ze diskutéieren amplaz déi virun e Fait Accompli ze setzen. Mir hätten dofir gär, datt dës Fro awer nach am Referendum gestallt gëtt, fir datt d’Regierung eng Legitimatioun vun deem Accord vum Bierger kritt.

Och d’Tatsaach, datt d’Chamberparteien nëmmen ënnert sech op den Informatiounsversammlungen diskutéiere wëllen, ass alles aneschters ewéi en Renouveau démocratique. D’Pirate wäerten sech awer während der Referendumskampagn amëschen, an dat mat enger eegener Kampagn. Eis Positiounen zu den am Ament bekannte Froen ass si kloer:

  • Walrecht fir 16 bis 18jähreger: JO
  • Residenzwalrecht: JO
  • D’Bezuele vun de Paie vu Geeschtlecher duerch de Staat: NEE
  • Beschränke vun de Mandatsdauere fir Ministeren: NEE

Bestierzung iwwert d’Attack op Charlie Hebdo dierf net zum Ofbau vu Grondrechter benotzt ginn

D’ganz Piratepartei ass bestierzt iwwert di hannerhälteg a feig Attack op déi franséisch Satirezeitung Charlie Hebdo haut de Moien. „Mir drécken eist déifste Matgefill de Familljen a Frënn vun den Affer aus.“ sou de Sven Clement, Parteipresident.

Et ass grad elo, no enger Terrorattack am Häerze vun Europa, wou eis oppen an tolerant Gesellschaft op d’Prouf gestallt gëtt. Sti mir zu eise Wäerter a verteidegen se och ënnert Drock an ënnert der Menace vun Attacken oder gi mir eis Grondwäerter op well Terroristen eis Angscht maachen?

D’Piratepartei rifft op d’Situatioun a Rou z’analyséieren an d’Konklu- sioune réischt ze zéie wann d’Terroriste gestallt sinn. „D’Äntwert op Attacken dierf net sinn, den Terroriste Recht ze ginn an eis Wäerter op- grond vun hirer Attack opzeginn, d’Äntwert op Terror a Gewalt muss méi Demokratie, méi Oppenheet, méi Pressefräiheet a méi Partizipatioun sinn.“ sou de Sven Clement weider.

„Mir mussen eng Gesellschaft schafen déi immun géint esou grujeleg Attacke wéi déi vun haut de Moie gëtt, doduercher verléieren dës hir Wierkung. Di falsch Reaktioun ass et elo d’Politik duerch d’Angscht diktéieren ze loossen.“ seet de Sven Clement ofschléissend, „Mäi Matgefill geet un all déi Betraffen, #JeSuisCharlie“


Vertrau kengem Walspot – informéier Dech!