Piratepartei Lëtzebuerg

Reboot Luxembourg!

Pressematdeelung: Procureur Général vum EuGH bestätegt: PNR-Ofkommes mat Kanada verstéisst géint EU-Grondrechtscharta

A sengem Avis vun haut huet de Procureur Général Mengozzi vum Europäesche Geriichtshaff um Kierchbierg d'Positioun vun de Kritiker, an domadder der Piratepartei, vum sougenannte Passenger Name Record (PNR)-Ofkommes mat Kanada bestätegt a seet, datt et aus verschiddensten dateschutzrechtleche Grënn net dierft a Kraaft trieden. D'Piratepartei freet sech iwwer dësen Avis a fuerdert esou wuel d'EU-Kommissioun ewéi déi lëtzebuergesch Regierung op hir Haltung a Saache verdachtsonofhängegen Datesammlunge séier ze änneren. De PNR, och Fluggastdatenspeicherung genannt, si bis zu 60 eenzel Donnéeën, ... Pressematdeelung: Procureur Général vum EuGH bestätegt: PNR-Ofkommes mat Kanada verstéisst géint EU-Grondrechtscharta weiderliesen

EU-Copyright-Reform: E Schauermärchen

Et ass einfach net dout ze kréien: dat sougenannten “Leistungschutzrecht”, wat Google a Co. beispillsweis dozou zwénge soll, fir d’Verlinken op Noriichtenartikelen ze bezuelen, taucht an engem Leak vun der proposéierter EU-Copyrightreform op. Datt dëst Konzept schonn an Däitschland a Spuenien no hanne lass gaang ass, gëtt am Dokument souguer als en vermeintlecht Argument bruecht, fir et op EU-Niveau duerch ze drécken. “Anstatt d’Leeschtungsschutzrecht als en Holzwee ze erkennen, soll de gescheiterte Modell elo op Europa-Tournee goen”, esou de Sven Wohl, Vizepresident vun der Piratepartei.

Och a punkto Copyright deet sech wéineg Guddes an deem iwwer 180 Säite laangem Dokument: bal iwwerall gëtt déi Léisung favoriséiert, déi der Lobby an de Krom passt. De Geoblocking bei Videoen bleift erhalen, woumatter de gemeinsamen EU-Marché en Dram bleift. Beim Geoblocking ginn Inhalter fir de Client gespaart, jee nodeem a wéi engem Memberstat hien sech befënnt. Eng Serie, déi zu Lëtzebuerg ze kréien ass, kann also an der Vakanz an Däitschland net gekuckt ginn, wann se do net erhältlech ass. Op der anerer Säit ass d’Muséksindustrie, déi op eng nach méi strikt Ëmsetzung vun hire Copyrightuspréch op Plattforme wéi Youtube pocht, allerdéngs vergësst, datt d’Ëmsetzung net funktionéiert an d’Notzer souwéi Start-Ups behënnert a benodeelegt. Och d’Panoramafräiheet feelt erëm: Et dierft een och an Zukunft net an all Membersstaat Fotoen vun ëffentleche Platze maachen.

Den Här Oettinger huet also erëm op daf geschallt, wat d’Besoine vun de Bierger an der EU ugeet an sech selwer zur Marionette vun der Lobby maache gelooss, wat der aktueller Anti-EU Stëmmung en Opwand gi kéint. Mat dëser ugeduerchtener Reform wärt Europa net prett sinn fir eng digital Zukunft. „Aus de Proposen erginn sech net nëmme wirtschaftlech, ma och gesellschaftlech a kulturell Problemer“, ënnersträicht den Sven Wohl, Vizepresident vun der Piratepartei.


D’europäesch Politik muss aus dem Brexit-Vote séier seng Léieren zéien

“Mir sinn net frou iwwer de britesche Vote géint d’Europäesch Unioun, et muss een awer elo domadder liewen an dat Bescht draus maachen.”, sou de Sven Clement, vun der Piratepartei an enger éischte Reaktioun op de Brexit-Vote.

D’Pirate setzen sech säit hirer Grënnung fir en Europa ouni Grenzen an, en Europa wat elo riskéiert ze zerbrieche wann net direkt a konsequent géigegesteiert gëtt. All d’Parteien, déi vum europäesche Projet iwwerzeegt sinn, an d’Piratepartei ass dat absolut, musse verstoe wat d’Stonn geschloen huet an endlech ophale mat dësem Friddensprojet ze spillen an ufänken sech eeschthaft drëms ze këmmeren. Dëse Brexit-Vote ass schliisslech och d’Resultat vu jorelaangem Schlechtmaache vun der Europäescher Unioun, anstatt de Leit ze erklären ewéi d’EU iwwerhaapt funktionéiert a Reformen ze ënnerhuelen, déi déi eigentlech Problemer léisen. “D’Europäesch Unioun muss elo séier méi demokratesch, méi verständlech a virun allem sozial ginn!”, sou de Sven Clement weider. “Fir datt mer dës Ziler hikréie brauche mer awer méi, an net ewéi d’Britten et elo virmaachen, manner respektiv guer keen Europa.”

Wat déi zukünfteg Verhandlunge mat Groussbritannie fir den Austrëtt uginn, muss d’Méiglechkeet fir Schottland an Nordirland, déi allen Zwee kloer géint de Brexit gestëmmt hunn, opgelooss ginn, fir weiderhi Member an der Europäescher Unioun ze bleiwen.

De Vote a Groussbritannien weist awer och nach eng Kéier kloer, datt ee Rietspopulisten à la Farage, Le Pen oder Wilders net doduercher kleng hält, andeems een hinnen einfach noschwätzt, vun der Aart a Weis ewéi och vum Inhalt hir. Populiste begéint een am Beschte mat kloer ausformuléierten Argumenter, Fakten a positiven Zukunftsvisiounen. Alles Saachen, déi een an ëmmer méi europäesche Länner, wéi och an der Europäescher Unioun u sech, ëmmer manner gesäit.


Vertrau kengem Walspot – informéier Dech!